هذا الرد الذي تفضل به الاستاذ الشاعر ع.االحيدري على قصيدة«حد آخر نفس وياک» للدكتور الشاعر عباس الطائي
حد الموت اظل وياک وانته اللي تگطر الماي
وامن اتموت أموت اوياک ما عوفک أبد يهواي
يالحبک نبت بچلاي وارموشک سهم بحشاي
يا نبعة حنان وشوگ يالحچيك همس بهداي
خل طيفک يمرني ابليل لحظه ولا ترد رجواي
أشوفنک ولو لحظات وأطبع رسمک إبعيناي
مسگومه ابهواک الروح وأثر بالدليل الداي
وانته ادواي يالمحبوب غيرک من يصير إدواي
من طحن الصبر مليت بيدک کسرت رحاي
گضيت العمر حيران، يابلوه مثل بلواي
يالطبعک مياه ونار يا جنة حلم دنياي
يانجمة صبح يالتزهي إبليالي إصباي
يازخة مطر طرواک بسنين المحل سلواي
بس بالطيف مربيه وإلي لا تعتني عناي
أجيك آنه ابعذاب وشوگ جايبلک هديه إوياي
اگلک روحي اخذهه وياک خومامش أعز من هاي!!
***
بس انته التظل إهواي،غيرک لا تظن يفلان يحلالي
وبس أنته التظل اوياي دوم ورسمک اگبالي
أحبک واليحب يفلان للمجبوب يفدي ويبذل الغالي
أحبک أکثر امن الروح يللي اهواک چتالي
أضحيلک بگايه الروح حن وارحم لعد حالي
أذوبن لو يمر طرواک أحنن لو تجي اببالي
سمت حبک بديل الروح بس حبک طلع غالي
عذب يالبالعشگ يفلان ليش اتمرمر احوالي
العشگ دمعه وحزن وآهات، لازم تسهر اليالي
العشگ جنه ودرج أحلام نصعد بيه للعالي
العشگ شلوه وطريج ابعيد شلوه وعيب بيهه الماي
من تعطش يولفی اهناک أسجيک ابدمع عيناي
ما عوفک أبد يهواي، ماعوفک أبد يهواي
***
خل طيفك يمرني ابليل يالمحبوب غبشيه
وخل نتسامر آنه اوياک، سوي اوياي حنيه
أفزن من لذيذ النوم صدّگ لو تمر بيه
وأوسدلک ابلب إحشاي والضلعين زوليه
ومن خمر العشگ يفلان نصحه ونشرب اشويه
لچن ما نسکر آنه اوياک خلنه ابغير حريه
وأتنازل الک يفلان بس کونک تظل ليه
أرید أسهر وأعوف النوم صدّگ الک ليليه
وأحچيلک چثيره أشعار ، موال وأبوذيه
وأدعي أهل الشعر وياي أقيمن ليله شعريه
وخل أشما يصير ايصير، لحگ صفي النيه
العمر خلص يبعد اچلاي،هالمر ابتواليه
وانا اشچمدوب أظل برجاک مليت الصبر يهواي
کافي امن الهجر يفلان عوف الأهل وامشي اوياي
ماعوفک أبد يهواي، ماعوفک أبد يهواي
***
اضغط
على السهم لقرائت قصيدة«حد
آخر نفس ویاک»
|