من الشعر الشعبي الاحوازي ،أبيات ابوذية وأهــــازيج وموال
تنويه: الأبيات منقولة ولم اتمكن من معرفة اصحابها
***
جمّال اگبل عليّ نـــوّخ ذلوله وعگــَـل
گتله امنین اگبلت گلي من دوّه وعگـل
گتله لمن تنتسب گلي الچفافي و عگِـل
گتله چثیره العرب گلي إبدوي من شمّر
گتله چیف الوکت گلي الوکت منشمر
گتله چیف الحکم گلي الحکم من شمر
گتله یشیب الطفل گـــلي یتیه العگـــل
***
عــَــربنه لیش مــا تلبس عگلها
ذلـّــت والهظـُم تــارس عگلها
عـَــدونه نوّخ اذلــوله و عگلها
أبارضنه و یدّعي راعي الثنية
***
بالچ خل يضل مرتاح اخوچ احمود يا حمده
اذا واعــــد وعد تدرين لازم يــوفي ابوعده
إله تشهد ليـــــالي السود سيفه ما قفه ابغمده
وإعله الـــذل ما غـُمضت عينه
***
اخوي العربي رفعت رأس و دم الخوه بعروگه
یرعد من یصیر اصیاح و یطالب دوم بحگوگه
بنینا الوطن بالهمه و صعد طابوگه طابـــوگه
و اهــــــواز ابأسمه ایسمونه
***
ضامیه اعلی المای چانت نخلت اهـــلي و یابسه
و صاحب الغیرة وحمية بالسجن خصمي حابسه
الیوم بس ظهرت نشامه اثیاب عــــــزة لابسه
و اتهوّس حگنه احنه انـــــــریده
***
یگلبی غیرهــــــــای الگاع مالک
حرس کــون الها انت و کون مالک
وحگ دفــــنت علي و دفنات مالک
اتحــــــرّر ماتظل هاي الثنية
***
تندب الغيــرة بأهـــلها اتحشّم و محَــد گـَـــرَب
و فرهــــدوا ثوب الكرامة و تنظر اعيون العرب
استملكوا ارض الحضارة و گصّوا اعثوگ الرطب
من شافـــو نايم ناطــــــوره
***
الرضع من ثدي الكرامه ابگصته عرج الغضب
ينبط و قـط ماهــــو عُـــربي كلمن ايـذم العرب
بيهــم العَـــــليا تعلـّت و الخصم كـع مــــا گرب
لحــــدود اخــوانچ يَمْ شيله
***
كلمن ابذنبه ايتحاسب و آنه ذنبي اتحمله
والوطن لو طلب روحي بيدي اقدمها اله
من محبته ما اجوزن لا وحگ رب العله
واتـــمنه استشهد بحــــدوده
***
ما يعجد الساني الخوف ، الخوف ابجدمي ادوسنه
و طريق البي هـــلي الامجاد ساروا ما اكــع منه
ابصراحه اهلي العرب قصدي وضدهُم هَم اضدنه
للموت اويــا عيب اتخـــاوه
***
حشم ابصوت المعالي و أذن ابزود و عَـزّم
و لاگي املاگه المنايا و لا تكع منها و تزم
من المنام النـــام اندهه خــــله يگعد يحتزم
بحزام اهل العز وأهل الغيرة
***
بسك بعــد من النــــوم دِلــــزَم صارمـــك يحمود
واغزيه الغزاك ابزود و اطلب ثار اخوك اسعود
ابجبينه تظل رگعت عار و اسمه ايظل عليه منگود
كلمن ما طـــالب بحگـــوگه
***
احبن نخلت الگنطار فـــــوگ اچتافــــي اشتلها
و انطرها ابعزم و ابزود عن لا خصم يدنه الها
مـُلك جد جدي و جدي و حـــالف قـَسم حاصلها
ما خلي الغربه ايضوگــــــونه
***
اليريــــد اُم المعــــالي عــيب يرضي ينسبُگ
و تضحيه اتريد القضيه مو فقط بس بل لبگ
خــــلنا آنــــــه وياك خـــلنا يبن عمي ننطبگ
و انغيــــر اعله العـــالوا بــــينه
***
الرجــل ينعرف بالمعروف مــا ينعرف بفلوسه
و هوسه التنشره و تنباع ابد ما تنحسب هوسه
الما گدها ابصريچ الماو تضل تترادم اضروسه
و الگـــــــدها ايعيّد بالضيجه
***
الفخر مو لليحد السيف الفخر لچفوف التشيله
و توگف للاسم حِرّاس عــــن لا بي تمر عيله
هاي اطباع اهـــالينه گبل هــــلهولت اُم شيله
تفـــــزع لـــو شافت عياله
***
يا وفي اببارود عزمك كحّل اعـــيون القيم
و حني اچفوف المبادئ بالدم و عنّز الشيم
خاطر اسمك يظل شوكت بحر بعيون العيّم
عـند اهلك تـــــاج اعله الهامه
***
صرت بحــر بعيون خصمي و كلها شافتني
و علي من حاطت الايام صدگ عيب ذلتني
تحزمت ابعزم يعرب و اختي الماجده اتحني
گلتلها ابـــدمي و دم گومي
***
15-01-2008