من الشعر الشعبي ننقل لكم قصيدة:
"یا زمـن"
یا زمن بسک مئاسي یا زمن بسک عذاب
یا زمن شیبت راسی ابزهوت أيام الشباب
***
یا زمن گوطر شبابی وعتلگ نجم المشیب
اوناخ زمل الأسی أبابي وابتعد عنی الجریب
یا زمن گصدک عذابی یا زمن طبعک عجیب
او لا اشوفن خل یواسی او یفتح أبوجهي الباب
***
یا زمن ماتت الغيرة یا زمن گوطر الجود
أو هفت تنور العشيرة و انتشر بیها الجمود
و الأسی امطرک ألديره الگبل مملیه اسود
والظلم قانون أساسي صار و اتطبقه الذیاب
***
یا زمن توجع الغربة أو ذلته ذلة الغریب
یا زمن و الهجرة صعبه الطفل من عدها یشیب
الوطن کعبه، الوطن تربة، الوطن كله خواطر للحبيب
الوطن متملک إحساسي، الوطن للعاری اثیاب
***
الوطن ملجأ ،الوطن دار ،الوطن هگوه ،الوطن باس
الوطن خيمة، الوطن جار، الوطن برکان الإحساس
الوطن مجموعة إزهار، الوطن جوری الوطن یاس
الوطن عزمی، الوطن باسی،الوطن ذكرى للحباب
***
یا زمن ضلت أحبابي ،یا زمن ضاع العمر
و انطفه موگد شبابی او طار من وچره الصگر
ازمول أسي امنوخه أبابي او ما تثور ابکل زجر
او صبح حتی الیود جاسی او طلع کل مایه سراب
***
یازمن محد یوافي یا زمن ماضل صدیق
او طافی بدر الأمل طافی الچان مشعل للطریق
یا زمن ما شوف صافي ابهل وکت حتی الشقیق
یا زمن ضاگت أنفاسي یا زمن و الأمل خاب
***
یا زمن خابت أظنوني یا زمن خاب الأمل
یا زمن رکت أعيوني و أصبحت مثل الکهل
ابحر و مذبوله أغصوني و اشبه العطش الجمل
شایل المای اعله راسی اوچبدی من العطش ذاب
***
یا زمن و العیشه تکلف والنفس مهره او عزوم
اولا أشوف الدنیه تنصف والظلم گاعد یدوم
لون رب البیت یعزف ترگص المیرشه تگوم
لچن ما ارگص او راسی مبنی ما یقبل إعراب
***
یا زمن ما اقبل الذل یا زمن ما اطخ رأس
بسفن غصباَ ترکب البل والمثل ما بي قیاس
الجبل شامخ چود ینزل ما ایهدم الجبل فاس
وانه مثل الجبل قاسی الموت أموته وما أهاب
***
الموت حنظل لچن احلی من حیاة ألبيها ذل
البیها فگدان الأخلة البیها خل یطعن الخل
البیها ابو الجنیب یعلی او حاط بلکوسی السل
البیها گام الخل یناسی من توجهله الخطاب
***
البیها لیل الظلم روح والگمر چفنه الغیم
البیها حادی الظیم طرح وآخ من حادی الظیم
البیها ظعن الشیب لوح ونگلب شیص البریم
البیها متسودن إحساسي البیها العذیبی ضباب
***
یازمن شرد اعد شکتب شرد اسولف یازمن
المحن ما تنحسب وحسب آه من جور المحن
اچعابی دومنهن ازعنب لون یوم الهن لچن
چان اظن وعت اجراسی النایمه ابگلب التراب
***
خاف احشم خاف انادی خاف محد یستمع
خایف ایگوطر الحادی او بربع ما ینجمع
یا زمن خایف افادي ایسیل یوم اویه الدمع
اوخاف یوم افگد حواسی الخمسه وینوح الغراب
***
خاف تغفه العین یوم او یرن ناقوس الممات
اودوم چفنی اینام او اهجر بالحظه حیات
موبگه العاگه یعوم اوذیبها اتلبس ابشات
اوطخت اجبال الرواسی او صبحت التفهم أحزاب
***
یا زمن مامن حقیقه یا زمن ماضل صحیح
راحت الناس العریقه او ضلت التبیع الریح
او شاع اسم کل کره شاع او عله الما یفهم عله
او غرگت الچانت کواسی او لانت الچانت اصلاب
***
یا زمن وختم أشعاري وارتجی امن الله السماح
لا اهدم بیدی داری ولا اضل اصفج الراح
الداري بالاسرار داري واللي مایدري مباح
الیدري أبرقم القیاسی ما أيضيع من الحساب
***
(القصیده یتیمه و منقولة من موقع ديرة هلي الثقافي)
04/08/2010