الشاعر شامخ کاظم عبیات المنصوري أبو عادل

الدارمي

لبنیلی سبع أقصور من صخر گلبک**** و بین القصور انداس سچه علی دربك

ما تدری های الروح متعذبه منک **** لکن یجیهه العید لو ضحک سنک

تدری من اهد فرگاک هل گلبی مغموت**** لو تالی أشگ اهدوم لو شوفن الموت

خلانی شمعه البین اضوی اللیالی**** شرجه اللیالی اسود ترحم أبحالي

صاحب صحیب البیه تنگط المروة****و اترک البد الذات و الخوته گوه

أرد اگطف ابمحچال کل عتبی لیکم**** هالبت سکفکم طاح خایب علیکم

أرد الطم علی الراح مثل النساوین****اثقب و أهلس الرأس و اتملطخ ابطین

کل المرض ینزاح بس مرض الفراگ****یلطع السیّن الموت لو الهم اشتاگ

کون أنا أصيرن طیر و أوصل سماکم****و أنقط عشر مرات گلبی هواکم

چنت أنا شایل دوم همک و همی****شنهو جنیت اویاک تحرگ أبدمي

یا گلبی بسک عاد بسک بعد عاد****چم حسره صارت بیک من فرگ الابعاد

جبت العمر یاصاح حسره اعلی حسره****و صار الملح منعوت عندچ یبصره

آمر علینه أرجوک و أمرک نطیعه****و ألما ینفذ کون رأسه گطيعة

بسکم بعد بس عاد هل یل تلومون****حامت علی دنیای و انتم تحومون

أرد اصرخ آنه أبصوت و اهتف ابهایه****انته البداية أتصير و انته النهاية

کل الهله ابملگاک یا شهل العیون****ما اگدر الفرگاک یا صاحبی اشلون

اچوی الگلب بالنار لو بی ندامة****لو طب طب و لو مال لو بی علامة

یا گلبی بسک عاد تهلک النوبة****عوف و بعد للموت اصرخ التوبة

یا روحی بسچ عاد مالچ تونین****نص ساعة ما شفتی حسبالچ أسنين

صعبه و تدمر الحال یا چلت الغروب****اصفن و أفکر بیک و امتیّه الدروب

گلبک صخر جلود ما بی محنه****لا رحم لا أنصاف بیک امتحنه

گلنه الدلال أيجوز یتغاوه خله****حط بالگلب یا ناس تالیهه عله

یا گلبی حیل أوياک طاگ و ألف طاگ****خایب تضل للموت تتحمل افراگ

گتلک أعيوني اثنین ملکک و أخذهن****أشمالک یا بد الذات بأصبع تبزهن

حس گلبی هذا الیوم راید یشوفک****لا تعتذر و اتگول صعبت ظروفک

هس الگلب و النوب کثر هسیسه****کسر الوکت ویای کسر الفريسة

الأبوذیة

یدهری دوسنی واگطف علی هام ****أبکثر مادست ماگولن علی هام

گضیت العمر یا وسفه علی هام ****دهر، صاحب، عدو داسوا علیه

******

شوصفلك أهموم العلي يختل ****وأحس بلعگل چنه أيريد یختل

علی دهری شبه صیاد یختل ****لزمنی وبلشوی عنده شهیه

*****

ابغسه کاس المراره شاربینه****و لا صاحب نصحنه شاربینه

و علی جمر المولع شاربینه****اشماگول احاه یچوی الیمر بیه

*****

الدنية ويه الرجال اشكثر مالات**** الشهم صد و استقر مرتعش مالات

مو شرط الرجل لو ملک مالات****الرجل غیره الرجل نخوة و حمیه

*****

یگلبی اندم دبس أياک و أياک****اترکه اللی أبنار الهجر وأياک

إذا يوم ٍ تصب العین وأياک****دمع تمساح یبچی بغیر اذیه

*****

علامة ایضیج خلگی ماله خلگی****الوکت وسفه أبوکاحه ماله خلگی

صحیبی السبب شنهو ماله خلگی****أشوف الموت من یزعل علیه

*****

رکضنه علی الدنية ما لحگنه****یحگنه علی الصاحب ما لحگنه

ألحگ الچان ألنه مالحگنه****وبیه أهل البطل کسبت قضیه

****

العذل طبع العواذل کفنه منهم****وبعد میهم حچیهم کفنه منهم

چم میت أبميت کفنه منهم****وچم مصیوب یتوسل تچیه

*****

اعضامی اتگوم تاذینی منصل **** علی الما یعرف الوزغه منصل

الفرع معروف للوادم منصل****غشیم اللی یوچدهن سویه

*****

اشد محلول و المشدود ینحل****وجسمی بالنزول و دوم ینحل

کلام اللی یغث بالگلب ینحل****اشبیدی الگلب ما ینسه ألرديه

*****

نوحی ما کسر خاطرک شبچای****و یوسفه صفه علی الحیطان شبچای

ردي حظی و وکت الصید شبچاي****أجرنه و یجي خالی بدیه

*****

إلهات

ذاب گلبی يأهل وادم منهواه****منهو حسره منهو نهته منهو آه

هوی اعذیبی و ترد روحی منهواه****و ما اچز منه و امل حد الممات

*****

الرجل دوم ایکون طبعه منعمه****و الیضدک ریت کونه منعمه

مو ابخولا اویاک رابط منعمه**** أجداد تربطنه سویه و ابهات

*****

هات یا گلبی لخبرک ما یلی **** الوکت أيمشي اویای چنه مایلی

و اللی عافنی او هجرنی مایلی**** ضاع کل تعبی و حسافه ألوفه مات

*****

المیمر

أتعدوا علی أحدود الغدر من عدهم ****راحوا او بالعده ابد من عدهم

والله يضيم العلی من عدهم ****طول العمر خلوا أعيوني تسهر

*****

مره ابتعد من صاحبی مره ادنی****یسحگ ابچبدی یاخلگ مردنی

شدعی اعلی گلبی أردود اله مرادنی ****خله أيشوف الشایفه و یتفرفر

*****

یا صاحبی وین الوکت یابانی****یا گلبی یلصانع قهر یابانی

اللی عملته أبحالتي یابانی*****عضت أصبعي للأبد و أتحسر

*****

منقول من موقع أدبنا         03-03-2010