من محبوبة الى حمدان
ابو خالد الطائي
سیلن یا دموع ادموم ارید اکتب رسالة ابدم
ارید احچي علیه اهمــوم أمطّر کل گلب غیّم
أحن واندب، ؤونَ واکتب وأصيحن صيحة المايور
ألف حسرة التهد الحيل، ما تطلع يكظها السور
ألف شوگ ابشرك ملفوف، محفوف إبألف ناطور
ياضيعه الضعت بيها صرت طير ابقفص محصور
اتلمّس طريج اهواي اريد اطلع واشوف النور
إيد اعلى الغريب اتطيح وايد اتطيح بالسّاطور
أچز وارجع على اتراب الحزن وابچي ابگلب مكسور
رحت عنك غصب يهواي موبيدي انگدت مقهور
لبسني الفراگ اشواگ هجرک واصبرت مجبور
ونته الي گلت اطوي الفیافي اولیک أفوي ابحور
چاوینک یبو النخوات شو مامش خبر میدور
نفسي ضاگت امن الروک روک الغـُرب روک ابزور
مُر بیه وخِذني اویاک یل نجواک إلي بلسم
تره ضیم الفراگ اطباگ ،هجرک والظلم والهم
***
لا طال العمر بفراگ لا لذت اعیوني ابنوم
لا طبّگ جفن بالضیم لا یهجع گلب مهضوم
حگها الرّوح تعبانه ولا شافت سعاده ابیوم
من حگه النفس لوضاگ یتنفس هوا مسموم
عوّث هلدهر ویاي میشوم الوکت میشوم
تتردّد تراها الروح بين الصدر والزردوم
وينك ليش ماتهتز يولفي او تنتخي وتگوم
ينشمى الما تلوچ العار، ما تلبس عليه اهدوم
طال العتب يا حمدان ونته امن العتب مندوم
زرع العتب ما خضّر ولا داوه جرحنه اللوم
ما طلّع نخل بالگاع ما تبچي عليه اغيوم
اريد اسگي ابدموعي الدار اريد ابچي حمر عندم
اريد احچي عليه اشصار أخلي ابكل سلف مأتم
***
تانیتک حبیبي اسنین شنهو العطلک شلهاک؟
یل حُبّک حیاة ابموت، روحي امعلگه بهواک
مُربیه ولو بالطیف، أفز بالنوم وتلگاک
یل ملگاک مزنه ابصیف من تجبل علی محلاک
حمدان الگلب مسگوم گوم او عالجه بشفاک
یل بشفاک راح او روح یا کأس الفرح عیناک
هاي الروح عطشانه دروّیها ابلذیذ الماک
هاک إیدي الشّرک شدها، دَهِدها، او مددهه عليّ يمناك
ونته الچانت العدوان ترجف من يمر طرواك
إسمع صوت محبوبة غریبه امعذبه او تنخاک
محبوبه تصيح ابصوت يا حمدان أنه بحماك
يا حمدان أنه برجواك، يا حمدان أنه برجواك...
|
|
