 |
الخاطرك |
الخاطرك
***
الخاطرك عاندت كَلبي وهاجرت
واحركَت كل الدفاتر
وشكَكَت كل الأوراق الزايده المنها خفت
وكَلت يمكن عام وارجع
وكَضه عا م ..واجه عا م
وتمشي السنين
وركد فوكَ الروح هجرك
ومدت الغربه اعلى عمري وخضرت
لا ليل اليرد طعم السوالف ذيج
ولا ذاك الربيع يعود
ولا نهر الوفه يرد الزمان اردود
غابت دورة الأفلاك
والطيور اتكَلي اصبر
الصبر للمظلوم جنه واصبرت
الخاطرك شفت الليالي السود
شفت الموت الاسود
ومن محبتك ماتبت
****
بطول ليل الوطن آني وياك رفكَه
واتفكَدك بين الروح
آني المضيع وفه
آني المضيع سما مابيها نجمك
ماهمن بكَلبي الجروح
ياشريج العمر
علمني ودادك بالشدايد تبتسم
ومن تبتسم ..كل الحدايق تفرح وعطرك يفوح
****
بلونك الأزهار تتلون
ويحلى الياسمين
والذنوب اتغسل بمايك تتوب
ومن صبر صبرك تلين
انت فوكَ الماي تضوي
بعيني تضوي
السفن تتلكَاك من تفرح وتضوي
والنسيم الحار لو مرْ بيك يبرد
واني جمر الروح بيَّ
من هواك شكثر واشكَد
لاعذابك ردلي فرحه
ولا فرح منك إجاني بليل ينشد
إبعد إبعد
نبض كَلبي بين إدييك
والأغاني ردت تغني عليك
والشمس رسمت محبتها عليك وعلى الطين
آني عمري وياك
ما ينطفي بكَطره
ولا دمع كل السنين
انت ماتعرف لهسه أسرار كَلبي
يضوي شوكَك بيَّ نجمه
وينطفي بدمي حنين
ينطفي بدمي حنين
------------
هولندا : سعد الشرِيفي